AL RÒSC
Con òna iniziativa ménga da tòtt digerìda,
i han fat dal ròsc òna rivoluziòun:
i han tirée via tòtt i cassunàt dla via
par al bèin dla natura e dl’ecologia,
i s’han dèe ed divérs culòr di bidòun
pensànd ed truvèr dal ròsc la soluziòun.
Con tòtti stal separaziòun
a dvintàm anch bruntlòun.
I s’han dèe al calendàri da guardèr
e i dè chi déven passèr,
a pasa anch quéndes dè e i fan dl’udòr,
ma sa impòrta, a ghè tant quée
chi fan dla pòzza, guai a lamentères,
par al bèin dla societè biségna abituéres!
Òna matèina al mé bidòun dl’orgànic,
pin d’avànz ed fruta e verdùra,
in l’han ménga vudée:
a ghéra un patachèin con òna cròs: “Troppo pesante”;
un’ètra volta: “Non idoneo al conferimento”.
Con al so soluziòun e invenziòun
is fan passèr anch caiòun!
Par capìr che un sacàt ed chèrta con l’òmed as ròump,
an ghè biségn d’éser un zervellòun.
Sa fòss in campàgna al bòtt a un maialèin
ch’al srév cuntèint ed fèr un bel spuntèin.
A forza ed pensèr, a i’ho truvèe la soluziòun:
a tir fòra al vec’ fugòun,
in dla caldéra a fag un minestròun
e al port a “Hera”, al Comùn e ai sapientòun.
Che bèl quèl: Spilambért,
paés ed ròsc a zél avért!
Ma an’avìdi timòr, a ghè òna cosa bèlla:
i han inventèe la pattumèlla!
LAURA BERTARELLI ELMI
Spilamberto, 8 novembre 2018
